O Consello de Goberno aproba a Conta Xeral de 2020
O Consello de Goberno aprobou este venres a Conta Xeral de 2020 da USC xunto co correspondente informe sobre a xestión de recursos económicos para poñer en coñecemento da comunidade universitaria e da sociedade aqueles aspectos e datos máis relevantes da xestión orzamentaria e financeira da institución. A singularidade do exercicio económico 2020, debido á crise sanitaria provocada pola pandemia da COVID-19 que afectou aos dous cursos académicos dese ano, fixo que se introducise un apartado específico no que salientar os aspectos económicos máis importantes para a USC como consecuencia desta crise.
A información básica sobre a liquidación comparativa dos orzamentos de ingresos e gastos, así como a liquidación do orzamento de ingresos e de gastos, son os tres primeiros apartados do documento no que tamén se abordan os resultados orzamentarios, actividades de I+D+i, de posgrao, contratación administrativa, inventario de bens mobles e inmobles, resumo da contabilidade analítica, informe sobre o impacto da crise sanitaria provocada pola pandemia da COVID-19 nos datos económicos do exercicio, así como outra información económica de interese.
Outro dos temas aprobados foi a proposta de tarifas para o curso 21/22, que non experimentarán modificacións con respectos ás do presente curso de acordo co Lei de Medidas Fiscais e administrativas da Comunidade Autónoma de Galicia. O documento, que deberá ser agora aprobado polo Consello Social, recolle as tarifas relativas ao Servizo de Deportes, Centro de Linguas Modernas, Escola Infantil Breogán, Servizo Universitario de Residencias, Cuarto Ciclo, tarifa administrativas de xestión académica e títulos propios.
No plano das titulacións, a xuntanza debateu sobre trámites de modificación de diversas titulacións de grao, mestrado e doutoramento, así como propostas de estudos de posgrao propio. Convenios, regulamentos de traballos de fin de estudos e asuntos económicos completaron a orde do día. No ámbito da xestión do persoal docente e investigador, na xuntanza aprobouse a autorización de prórrogas de prazas de profesorado contratado así como as comisións de selección de diversas prazas, ademais dos complementos de recoñecemento de mérito docente e os complementos retributivos autonómicos, entre outras cuestións.