Un curso de verán da USC ensina aos estudantes o uso básico das técnicas bioinformáticas

A bioinformática é unha ciencia interdisciplinar sobre o uso de técnicas matemáticas, informáticas, algorítmicas e estatísticas para resolver problemas biolóxicos como o ensamblaxe de xenomas completos ou a modelación da evolución. Para ofrecer un coñecemento básico destas ferramentas, o curso de verán da USC ‘Aplicacións da bioinformática en acuicultura, a gripe aviaria (H5N1), microarrays, e SNPs’ ofrecerá do 16 ao 20 de xullo na Aula Magna da Facultade de Matemáticas unha aproximación teórica e práctica a esta disciplina.
As sesións académicas do curso, dirixido polo profesor José A. Álvarez Dios, divídense en dous bloques. O primeiro deles, titulado ‘Gripe aviar e técnicas de visualización’, constará dun total de cinco conferencias e un obradoiro práctico acerca da análise bioinformática do virus H5N1 responsable dos focos de gripe aviar que ocorreron nestes últimos tempos. No segundo bloque, denominado ‘Acuicultura’, revisarase as distintas ferramentas bioinformáticas implicadas nas actividades de I+D en acuicultura.
Programa do cursoCoa conferencia ‘Nocións de bioloxía molecular para bioinformáticos’, as sesións académicas darán comezo o luns 16 nunha xornada na que tamén se. tratará a secuenciación de ADN, a gripe aviaria e o uso do Influenza Virus resource na análise bioinformática do H5N1.
Ao día seguinte, os expertos falarán sobre microarrays como ferramenta para a análise da expresión xénica ou a súa utilización na acuicultura e o mércores 18 continuarase a explicar esta técnica xunto co estudo e representación gráfica de secuencias xenéticas ou o proxecto internacional HapMap. Xa o xoves 20 explicarase o uso do SNPs e o venres 20 abordarase a farmacoxenómica e a farmacoxenética.
No transcurso do curso, a Facultade acollerá ao mesmo tempo unha serie de talleres nos que os estudantes aprenderán de xeito práctico a segmentación e extracción de datos de imaxes de microarrays, a gripe aviaria e filoxenia, o proceso de elaboración dunha libraría de ESTs xunto coa análise de microarrays con R, Bioconductor e Matlab.