David Rubinos recolleu en San Xerome o Premio de Investigación Juan Artieda

O reitor da USC, Senén Barro, presidiu este mércores o acto de entrega do Premio Juan Artieda que a Asociación para a Investigación e Desenvolvemento Industrial dos Recursos Naturais (AITEMIN) lle concedeu a David Rubinos González, do Departamento de Edafoloxía e Química Agrícola. Ao doutor da USC recoñecéuselle a súa tese de doutoramento -que leu en 2008- sobre a utilización de lodos de bauxita na contención e inactivación de residuos tóxicos e perigosos.
Participaron na cerimonia de entrega, ademais do reitor e o premiado, o presidente e vicepresidente da Asociación, Juan Ramón García e José Cárdenas; e os directores da tese premiada, os docentes Mª Teresa Barral e Francisco Díaz-Fierros.
O traballo de David Rubinos parte do desenvolvemento sostible como un dos retos da sociedade actual. “Se nos séculos XIX e XX se pensaba que os recursos naturais se podían explotar sen fin, hoxe sabemos que iso non é así”, explica. De aí a importancia da reutilización dos residuos industriais “que minimizan os riscos ambientais”.
Na súa intervención defendeu a necesidade de explorar novas vías de reutilización de residuos como contraposición ao almacenamento en fábricas, “cun alto impacto ambiental”. En concreto, Rubinos profundou no lodo vermello “tentando cambiar a súa percepción de residuo a recurso”.
Premio Juan ArtiedaO premio, de carácter estatal e dotado con 6.000 euros, pretende distinguir os mellores traballos de investigación tecnolóxica que constitúan teses doutorais sobre exploración, valorización, conservación, explotación, aproveitamento, restauración e reciclado dos recursos naturais minerais, hídricos, enerxéticos, de estrutura xeolóxica e do solo, sempre que se traten nos seus aspectos non bióticos, inclusive os de xestión, medioambientais e patrimonio.