A delegación territorial de Galicia da Sociedad Española de la Ciencia del Suelo homenaxea ao profesor Francisco Guitián Ojea

Considerado o mestre dos edafólogos galegos, o profesor Francisco Guitián Ojea, falecido o pasado ano, recibiu este mércores unha homenaxe no transcurso da primeira xuntanza celebrada pola delegación territorial de Galicia da Sociedad Española de la Ciencia del Suelo (SECS). A sesión celebrouse no Salón de Actos do Instituto de Investigacións Agrobiolóxicas (CSIC) coa presenza do reitor compostelán Juan Casares. O doutor Guitián, catedrático de Edafoloxía e Química Agrícola iniciou a súa traxectoria docente e investigadora no Consejo Superior de Investigaciones Científicas (CSIC) de Santiago continuándoa na Universidade de Santiago de Compostela, onde foi decano da Facultade de Farmacia. Francisco Guitián foi o primeiro catedrático de Edafoloxía na USC e o creador da escola de edafólogos galegos da que hoxe en día forman parte ducias de investigadores na comunidade galega. Na súa traxectoria investigadora compaxinou, de xeito admirable e innovador para o seu tempo, o rigor da investigación científica coa colaboración con algúns dos sectores produtivos máis importantes de Galicia, particularmente no eido da industria cerámica, e a preocupación polo medio ambiente. O programa deste acto homenaxe tivo como eixo central as conferencias pronunciadas polo profesor da USC e anterior presidente da SECS Felipe Macías Vázquez, quen explicou a orixe e funcións da sociedade; do tamén profesor da USC Francisco Díaz-Fierros falando sobre os factores de formación do chan en Galicia; e da doutora Tarsy Carballas coa intervención ‘Francisco Guitián: lembrando ao que foi o noso punto de partida’. Para completar a xornada o profesor da USC Eduardo García-Rodeja moderou unha mesa redonda sobre ‘Ciencia do solo e sociedade’ na que participaron especialistas das tres universidades galegas así como representantes dos sectores profesionais afíns. Reunión da delegación territorial galega A delegación territorial de Galicia da Sociedad Española de la Ciencia del Suelo (SECS) reuniuse por vez primeira este mércores 21, coa participación dos seus máis de 60 socios, pertencentes maioritariamente ás universidades galegas e máis concretamente á de Santiago. Esta delegación constituíuse o pasado mes de abril nunha sesión na que tamén se elixiu como presidenta á profesora de Edafoloxía e Química Agrícola, María Teresa Barral Silva. Esta primeira reunión, ademais de propiciar o coñecemento e colaboración dos membros desta sociedade que traballan en Galicia, permitirá reflexionar colectivamente sobre as funcións desta sociedade científica e as circunstancias actuais da ciencia do solo, dende a perspectiva da comunidade galega. Encontro co reitor Na xornada previa á celebración do encontro, o reitor Juan Casares recibiu o martes no seu despacho en San Xerome ao presidente de SECS Jaume Porta, quen estivo acompañado de Mª Teresa Barral e da tesoureira da SECS, Montserrat Díaz. Nesta xuntanza, o profesor Porta presentoulle ao reitor compostelán as liñas estratéxicas da SECS para o período 2010-2011 e en concreto o proxecto Glosecs, un glosario de termos desta disciplina científica en española, inglés e francés, ademais de en galego, catalán e euskera. SECS

A SECS é unha entidade científica con mais de 60 anos de existencia e que agrupa a máis de 400 especialistas, dedicada a promover o estudo, a investigación e a protección do solo, difundir na sociedade a importancia das funcións do solo como recurso natural non renovable a escala humana e o interese da súa protección, ademais de preservar o coñecemento adquirido sobre o chan, a súa xestión e utilización, tanto en aspectos produtivos coma ambientais. A SECS pretende dar resposta aos usuarios directos (agricultores, gandeiros, silvicultores e técnicos), así coma aos xestores medioambientais, os que planifican o uso do solo e a todos aqueles que toman decisións que lle afectan.