A delegación territorial de Galicia da Sociedad Española de la Ciencia del Suelo reúnese por vez primeira este mércores en Santiago
A delegación territorial de Galicia da Sociedad Española de la Ciencia del Suelo (SECS) reúnese por vez primeira este mércores 21, coa participación dos seus máis de 60 socios, pertencentes maioritariamente ás universidades galegas e máis concretamente á Universidade de Santiago. Esta delegación territorial constituíuse o pasado mes de abril nunha sesión na que tamén se elixiu como presidenta á profesora de Edafoloxía e Química Agrícola, María Teresa Barral Silva.
Esta primeira reunión, ademais de propiciar o coñecemento e colaboración dos membros desta sociedade que traballan en Galicia, permitirá reflexionar colectivamente sobre as funcións desta sociedade científica e as circunstancias actuais da ciencia do solo, dende a perspectiva da comunidade galega. Deste xeito, na sesión programada para o mércores, que contará coa presenza do presidente da SECS e ex reitor da Universidade de Lleida, Jaume Porta, impartirán tres conferencias Tarsy Carballas, Felipe Macías Vázquez e Francisco Díaz-Fierros Viqueira, ademais de celebrase unha mesa redonda coa intervención de representantes dos distintos Campus universitarios galegos. O encontro comezará ás 9:30 horas no Salón de Actos do Instituto de Investigacións Agrobiolóxicas (CSIC).
Nesta mesma xornada será obxecto de lembranza e homenaxe o profesor Francisco Guitián Ojea, mestre dos edafólogos galegos, falecido o pasado ano. O doutor Guitián, catedrático de Edafoloxía e Química Agrícola iniciou a súa traxectoria docente e investigadora no Consejo Superior de Investigaciones Científicas (CSIC) de Santiago continuándoa na Universidade de Santiago de Compostela, onde foi decano da Facultade de Farmacia. Francisco Guitián foi o primeiro catedrático de Edafoloxía na USC e o creador da escola de edafólogos galegos da que hoxe en día forman parte ducias de investigadores na comunidade galega.
Na súa traxectoria investigadora compaxinou, de xeito admirable e innovador para o seu tempo, o rigor da investigación científica coa colaboración con algúns dos sectores produtivos máis importantes de Galicia, particularmente no eido da industria cerámica, e a preocupación polo medio ambiente.
Encontro co reitor
Na xornada previa á celebración do encontro, o reitor Juan Casares recibiu este martes no seu despacho en San Xerome ao presidente de SECS Jaume Porta, quen estivo acompañado de Mª Teresa Barral e da tesoureira da SECS, Montserrat Díaz. Nesta xuntanza, o profesor Porta presentoulle ao reitor compostelán as liñas estratéxicas da SECS para o período 2010-2011 e en concreto o proxecto Glosecs, un glosario de termos desta disciplina científica en española, inglés e francés, ademais de en galego, catalán e euskera.
SECS
A SECS é unha entidade científica con mais de 60 anos de existencia e que agrupa a máis de 400 especialistas, dedicada a promover o estudo, a investigación e a protección do solo, difundir na sociedade a importancia das funcións do solo como recurso natural non renovable a escala humana e o interese da súa protección, ademais de preservar o coñecemento adquirido sobre o chan, a súa xestión e utilización, tanto en aspectos produtivos coma ambientais. A SECS pretende dar resposta aos usuarios directos (agricultores, gandeiros, silvicultores e técnicos), así coma aos xestores medioambientais, os que planifican o uso do solo e a todos aqueles que toman decisións que lle afectan.