Unha nova edición do Campus Inclusivo desenvólvese estes días en Santiago

O encontro Campus Inclusivo iniciou este luns 28 a andaina dunha nova edición nun acto protocolario no Salón de Graos do Colexio de San Xerome presidido polo reitor Juan Casares e no que tamén interviñeron a presidenta do Consello Territorial da ONCE en Galicia, Mª Dolores Venancio e Natalia Álvarez Liébana en representación da Fundación Repsol. O Campus Inclusivo crea un espazo de intercambio de experiencias mediante o desenvolvemento de actividades académicas, deportivas e culturais que permita coñecer as posibilidades que a USC ofrece ao estudantado con necesidades educativas especiais. O encontro permitirá a un grupo de estudantes con discapacidade, previamente seleccionados no ámbito da iniciativa ‘A túa formación non ten límites, desenvolve o teu futuro’, coñecer os proxectos educativos, as instalacións e recursos de apoio que a USC poría ao seu servizo na etapa universitaria. O reitor compostelán afirmou neste acto inaugural e de benvida que a finalidade da iniciativa corre parella á misión da Universidade como servizo público, satisfacendo un interese e un dereito, o da educación, como manifestación a prol da inclusión social. Nun relato no que apelou ao carácter universal da institución universitaria, Casares asegurou que a experiencia “nos forza a traballar xuntos” tanto no relativo a barreiras arquitectónicas pero tamén máis alá, nas barreiras de relación e asegurou que “traballaremos para atender a vosas necesidades”. As representantes tanto da Fundación ONCE como da Repsol, entidades colaboradoras do Campus Inclusivo, agradeceron a implicación da universidade compostelán neste proxecto cun chamamento ao alumnado participante porque “non hai que poñerse límites” e que a iniciativa ademais dun contacto co contorno universitario é “unha experiencia de vida”, enfatizou Natalia Álvarez. Nesta mesma perspectiva, a formación de calidade resulta fundamental na posterior inclusión social das persoas con discapacidade, explicou Mª Dolores Venancio, quen se referiu á importante porcentaxe de persoas con discapacidade que non continúan estudios ao rematar o período de ensino obrigatorio. A representante da Fundación ONCE considera que o Campus Inclusivo “é unha experiencia que non se debe desaproveitar”. Nos próximos días, o Campus Inclusivo ofrecerá ao alumnado seleccionado información sobre a organización e servizos da USC, actividades deportivas, sobre os protocolos para a integración da comunidade universitaria, a oferta de graos e posgraos e desenvolverá visitas ás instalacións da institución compostelá. Para completar este período asistirán na Coruña ao Congreso Estatal do Voluntariado.