Nova edición dos cursos de posgrao e formación continua en medicina china

A USC achega coñecementos de medicina china na oitava edición dos Cursos de Posgrao e Formación Continua en Acupuntura e Moxibustión nos que se proporcionará un coñecemento sólido das súas bases e métodos terapéuticos xunto cunha introdución da famacopea china. O prazo de inscrición nas clases, dirixidas a licenciados en Medicina e Farmacia e organizadas polo Departamento de Fisioloxía, xa está aberto.
Co obxectivo principal de capacitar aos alumnos para o exercicio destas prácticas médicas dunha forma segura e eficaz, os cursos están a cargo de profesores médicos ex bolseiros na República Popular China onde obtiveron unha experiencia profesional de máis de 6 anos de duración xunto con docentes de nacionalidade china e da Facultade de Medicina da USC.
O Hospital Clínico Universitario de Santiago será o lugar de realización das sesións académicas nas que tamén colaborarán os Servizos de Anestesia e Reanimación, coa súa Unidade do Dor, e de Rehabilitación.
Máster e cursosO Máster de Acupuntura e Moxibustión terá unha duración de dous anos durante 36 fins de semana e trescentas horas de prácticas aínda que existe a modalidade intensiva cun mínimo de cinco meses. Ademais, impartirase o Curso de Especialización Introdución á Acupuntura e o seu Uso no Tratamento da Dor durante un ano, coa versión reducida de tres meses, e cen horas para aplicar o aprendido.
Por outra banda, ofrécense cursos de formación continua sobre aspectos tan variados como as bases anatómicas e neurofisiolóxicas da acción da acupuntura, teoría de medicina tradicional china, métodos diagnósticos, dietética ou tratamentos de patoloxías xinecolóxicas, dixestivas, respiratorias, psicoemocionais, urolóxicas, cardiovasculares, pediátricas ou dermatolóxicas, entre outras moitas cuestións.