A entrega de premios pecha a décimo sexta edición do Concurso de Ideas Empresariais Innovadoras

A viabilidade e factibilidade, o carácter innovador, o grao de madurez, o mercado potencial e a presenza de políticas de igualdade son elementos comúns ás cinco propostas premiadas este mércores 12 no XVI Concurso de Ideas Empresariais Innovadoras, cuxo acto de entrega de premios presidiu o reitor Antonio López no Colexio de San Xerome. Nesta ocasión foron galardoadas unha pulseira para detectar drogas, unha impresora 3D para enxeñaría de tecidos, un novo cepillo para mostras en citoloxía cervical, unha aplicación móbil para propiciar unha visión de xénero da cidade ou unha proposta para explotar comercialmente o huitlacoche.

No acto de entrega acompañaron o reitor as secretarias xerais de Igualdade e de Emprego, Susana López Abella e Covadonga Toca Carús, respectivamente; e o presidente do xurado, o director da Área de Valorización, Transferencia e Emprendemento da USC José L. Villaverde Acuña. Á convocatoria deste ano concorreron un total de 190 ideas, promovidas na súa maioría por mulleres (o 54% das propostas presentadas). Ademais, o 70% do total das propostas pertencen á área de Ciencias Xurídicas e Sociais e na mesma porcentaxe ao colectivo de estudantes.

Pulseira antidroga Rita María Pose Curros, estudante da Facultade de Ciencias Económicas e Empresariais, é a promotora da idea para desenvolver unha pulseira flexible lavable que, chegado o caso, puidera utilizarse como un dispositivo para a detección de drogas ou outras sustancias en bebidas. Tratase dun produto a desenvolver en colaboración co grupo Pharmatox e que a súa promotora dirixe principalmente a mulleres, ao estar inicialmente pensada para a detección de sustancias vertidas nas bebidas coa finalidade de anular a vontade da persoa.

Creando Cidade Co lema ‘Creando cidade’ Pablo Sarmiento Neira, alumno de Filosofía, propón a creación dunha aplicación para dispositivos móbiles mediante a que se poda ter unha visión de xénero da cidade. Como explica o seu autor, ao colocar a cámara dun dispositivo móbil cara unha escultura, a súa app xeraría outra estatua análoga con forma de muller. O obxectivo e “cambiar a semántica do espazo, salientando as voces de mulleres silenciadas que tiveran unha achega relevante á cidade”. Como sinala Pablo Sarmiento, Santiago “apenas ten estatuas dedicadas a mulleres e moito menos un urbanismo feminista. A idea desta app podería ser a primeira de máis ideas destinadas a construír unha cidade para todos e todas”.

Huitlacoche galego O huitlacoche é o produto da infección do millo por un fungo, Ustilago maydis, que induce a formación de tumores de gran tamaño e que en América foi o causante de numerosas perdas na agricultura. A particularidade é que estes tumores “son comestibles e están considerados unha exquisitez da cociña mexicana”. Cristina Cabaleiro Sobrino, profesora da Escola Politécnica Superior de Enxeñaría de Lugo, propón a comercialización directa de huitlacoche e un servizo de inoculación a demanda para agricultores que posúan parcelas específicas con potencial para a produción.

Na opinión de Cabaleiro Sobrino, as condición ambientais para este cultivo en moitas zonas de Galicia son favorables, de xeito que “un problema nas variedades tradicionais do millo se converta nunha oportunidade para diversificar a súa oferta asociada”. A profesora do Campus de Lugo manifestou a súa disposición de ceder esta idea a calquera persoa que a queira desenvolver, un guante que colleu a tamén premiada Rita Pose, participante no Programa Argos da USC e que se mostrou interesada.

Mostras en citoloxía cervical A partir do dispositivo utilizado na actualidade para a citoloxía cervical, a estudante da Facultade de Enfermaría Aitana García Álvarez propón crear un contedor no cal fose posible depositar a cabeza do cepillo coas células recollidas e deixalo introducido no medio líquido para un mellor aproveitamento das mostras, evitando ter que facelo de modo manual. A idea de Aitana García propón a comercialización do mencionado cepillo así como do recipiente de conservación, dirixidos ambos a laboratorios, clínicas, hospitais e centros médicos dedicados a este tipo de análises.

Bioimpresora 3D O profesor da Facultade de Física Daniel Nieto García foi premiado pola súa idea para o desenvolvemento dunha bioimpresora 3D baseada nun sistema de modulación espacial de luz UV que permita xerar patróns tridimensionais que, en combinación con biomateriais/hidroxeles sensibles a UV e que conteñen células, posibiliten a fabricación tridimensional de tecidos 3D artificiais. Como explica o seu autor, o funcionamento é semellante ao dunha impresora estereolitográfica convencional pero, neste caso, utilizando tinta que conteña células vivas.

En opinión de Daniel Nieto, coa súa proposta é posible fabricar estruturas 3D que conteñan células en tempos de fabricación curtos evitando a morte celular durante a bioimpresión. Os tecidos resultantes poden ser empregados para o estudo de modelos de enfermidades ‘in vitro’ ou para a avaliación de drogas reducindo así o traballo con animais.