Entrega dos premios do XII Concurso de Ideas Empresariais Innovadoras da USC

O reitor Juan Casares presidirá este martes 27 a entrega de premios aos gañadores do XII Concurso de Ideas Empresariais Innovadoras da USC. O acto protocolario celebrarase a partir das 12:00 horas no Salón Reitoral do Colexio de San Xerome. Xunto o reitor está prevista a presenza do subdirector xeral de Apoio á Contratación, aos Emprendedores e ao Traballo Autónomo da Consellaría de Traballo e Benestar, Jorge Barros de la Peña; da vicerreitora de Responsabilidade Social e Calidade, Benita Silva; do vicerreitor de Estudantes, Cultura e Formación Continua, Francisco Durán; e do director do programa Uniemprende, Carlos Hernández Sande.

A este nova convocatoria, dirixida a todos os membros da comunidade universitaria galega de calquera das áreas de coñecemento, presentáronse un total de 241 ideas, das que só cinco recibirán os 600 euros de premio unha vez valorada a súa viabilidade empresarial, o carácter innovador, o grao de madurez, o mercado e a posible aplicación de políticas de igualdade.