A EPS de Enxeñaría avanza nunha innovadora tipoloxía de construción de peiraos co sistema Pilote-Lámina
A Escola Politécnica Superior de Enxeñaría do Campus Terra da USC desenvolve unha innovadora tecnoloxía de construción de peiraos baseada no sistema pilote-lámina, tal e como se recolle na tese de doutoramento ‘Presentación e análise de viabilidade dunha nova tipoloxía de peirao: o pilote-lámina’, que vén de presentar no centro universitario lugués o xefe de departamento de Servizos Portuarios da Autoridade Portuaria da Coruña, Emilio García García.
Na súa investigación de doutoramento, dirixida polos profesores Gregorio Iglesias Rodríguez e Alberte Castro Ponte, este enxeñeiro civil presenta a nova tipoloxía de obra de atraque e amarre denominada sistema Pilote-Lámina e explica as chaves desta tecnoloxía innovadora baseada no funcionamento conxunto de pilotes e de elementos tipo lámina.
A nivel estructural, segundo detalla Emilio García na súa tese de doutoramento, a resposta desta nova tecnoloxía de construción de peiraos recae sobre os cometidos específicos de cada un dos seus dous elementos. Daquela, explica, os pilotes traballan fundamentalmente a flexión e as láminas, a tracción. Este labor complementario permite optimizar e aproveitar ao máximo as propiedades mecánicas dos mateirais constitutivos do pilote-lámina.
Unha vez analizada a viabilidade desta nova tipoloxía de construción de peiraos desde diferentes perspectivas e puntos de vista directamente relacionados con cuestións funcioanis, procedementos construtivos, custe económico, efectos e impactos medioambientais, as conclusións acadadas por Emilio García García na súa tese de doutoramento convidan a seguir a traballar para avanzar e perfeccionar o desenvolvemento de este innovador sistema, que se antolla como unha tecnoloxía acaída para a construción de peiraos.
Tribunal de tese e cualificación
O profesor do Departamento de Construción e Enxeñaría da Fabricación da Universidade de Oviedo, Mario López Gallego, presidiu o tribunal da tese de doutoramento presentada por Emilio García García. O profesor de Enxeñaría Mecánica da Universidade de Vigo Carlos Pérez Collazo, e a profesora de Enxeñaría Cartográfica, Xeodésica e Fotogrametría na EPSE da USC, Mariluz Gil Docampo, que actuou como secretaria, completaron un comité avaliador que outorgou a máxima cualificación de sobresíante cum laude a esta investigación de doutoramento.
