Un equipo da USC gaña a final española do Global Management Challenge

Un equipo da USC integrado por Laura González, Carlos Estévez e Estefany Cuadros, de Administración e Dirección de Empresas; Álvaro Silva, do Máster en Enxeñaría de Procesos Químicos e Ambientais; e Iago Quiñones, de Enxeñaría Informática, proclamouse vencedor da fase nacional do Global Management Challenge, a maior competición sobre estratexia e xestión do mundo. Tres dos integrantes do equipo da Universidade compostelá, concretamente Laura González, Carlos Estévez e Alvaro Silva xa se atopan en Macau (China) onde se desenvolverá fase internacional da competición. Dirixido a estudantes universitarios interesados en completar a súa formación mediante un xogo de simulación empresarial en liña, o Global Management Challenge é unha competición creada en 1980 enfocada a fomentar o espírito emprendedor, o desenvolvemento persoal e profesional dos participantes, potenciando as súas habilidades, capacidades, actitudes, aptitude, coñecementos e experiencia no ámbito da xestión empresarial.

Presente en 30 países arredor do mundo, ten unha fase nacional e outra internacional na que compiten os gañadores de cada país. Na fase nacional, o equipo compostelán competiu con 40 equipos de universidades e escolas de negocios españolas. Nesta fase internacional, o representantes da USC contan co apoio da Vicerreitoría de Estudantes e da Cátedra Bancaja de Mocidade Emprendedora.