A Escola de Doutoramento Internacional da USC amplía o prazo de inscrición no IV Encontro da Mocidade Investigadora

A Escola de Doutoramento Internacional (EDI) da USC vén de ampliar ata o vindeiro mércores 11 de maio o prazo de inscrición no IV Encontro da Mocidade Investigadora, un foro que volverá reunir boa parte do persoal investigador en formación da USC os días 9 e 10 de xuño na Facultade de Ciencias da Comunicación de Santiago de Compostela.

Do mesmo xeito que en edicións anteriores, o IV Encontro da Mocidade Investigadora permitirá outorgar maior visibilidade a traballos de investigación que se están a desenvolver na USC, ao tempo que se favorecerá o debate en obradoiros, relatorios e táboas redondas sobre diversas cuestións de interese, entre as que se atopan as estadías de doutoramento ou o futuro alén da etapa de tese. Estas xornadas, promovidas pola Escola de Doutoramento Internacional da USC serven para fomentar a colaboración e intercambio de coñecementos entre os membros dos diversos programas de doutoramento, ao tempo que constitúen un punto de encontro do alumnado, así como un foro acaído para compartir experiencias e inquedanzas propias de cada etapa da investigación. O formato de presentación dos traballos no marco deste encontro será mediante unha exposición oral de cinco minutos ou póster. A participación está aberta a todos os alumnos e alumnas matriculadas nun programa de doutoramento da USC ou programas interuniversitarios. A información desta nova edición do Encontro da Mocidade Investigadora da USC irase actualizando na web da Escola de Doutoramento Internacional.