A Escola Politécnica Superior organiza un novo curso práctico de técnicas aplicadas á microscopía de pensos

O cada día máis complexo proceso de elaboración de alimentos discorre paralelo ao incremento dos controis de calidade neste sector. A microscopía é unha das principais ferramentas utilizadas no control de calidade desta industria, ao reunir como calidades a rapidez e a economía no proceso de valoración tanto das materias primas como dos produtos terminados. En resposta a esta realidade, a Escola Politécnica Superior de Lugo (EPS) organiza do 13 ao 17 de xuño o curso práctico de formación ‘Técnicas aplicadas de microscopía de pensos’, que este ano alcanza súa décimo terceira edición. No desenvolvemento desta acción formativa da EPS se mostrará a metodoloxía práctica a seguir para a identificación de ingredientes, detección de contaminacións, adulteracións así como a avaliación cualitativa e cuantitativa dun penso, todo dende un punto de vista eminentemente práctico. Tamén se prestará especial atención aos compoñentes de orixe animal debido á regulamentación europea no relativo á incorporación de fariñas animais na alimentación de rumiantes e monogástricos. Abordaranse tamén os pensos destinados a especies maiores, así como os de canaricultura e piscifactorías. Os principais destinatarios desta iniciativa son os profesionais do sector da empresa de fabricación de pensos principalmente de Galicia, así como do resto de España e de Portugal.