A Escola Universitaria de Enfermaría apela ao impacto social a través da innovación

As XXVIII Xornadas nacionais e XXI Xornadas Internacionais de Enfermaría desenvólvense o 1 e o 2 de abril, no Salón de Actos do Hospital Universitario Lucus Augusti, baixo o lema 'O poder da enfermaría: máis innovación, máis impacto'. A inauguración que tivo lugar este martes 1 contou coa participación do vicerreitor de Organización Académica e Campus de Lugo, Francisco Fraga; a directora da Escola Universitaria de Enfermaría, Mª Pilar Penela Puga; e o conselleiro de Sanidade da Xunta de Galicia, Antonio Gómez Caamaño. A continuación, a conferencia inaugural das xornadas correu a cargo do catedrático da USC, Ángel Carracedo, e versou sobre 'O Proxecto Xenoma de Galicia: Unha oportunidade para a nosa terra'.

Ao longo dos dous días, diversas mesas redondas servirán para afondar en cuestións como a innovación en acceso venoso ecoguiado, a investigación en Enfermaría sen fronteiras, o desenvolvemento de competencias de investigación na formación de grao, o voluntariado na Escola Universitaria de Enfermaría de Lugo, a enfermaría nas Forzas Armadas, ou o debate arredor de experiencias compartidas na práctica profesional. Ademais, as xornadas tamén contarán con obradoiros sobre diversas temáticas. Máis de 300 persoas danse cita neste foro.