O estudante Marco Nieto, no ‘top 15’ do Estado do programa europeo de emprendemento para xente nova
O emprendedor Marco Nieto, estudante de último ano do grao de Enxeñería Química na Universidade de Santiago de Compostela, acaba de ser seleccionado dentro do top 15 de Proxectos Startup Programme España. Nieto, que leva dous anos participando neste programa, presentará o seu proxecto en Madrid os días 21 e 22 de maio, competindo por diversos premios e coa posibilidade, en caso de gañar, de representar a España no evento mundial do Startup Programme en Atenas, onde se enfrontarán ás mellores ideas emprendedoras a nivel global.
Proxecto de longo percorrido
Nieto lidera desde hai tres anos o equipo de EO Energía, unha startup que fundou xunto ao seu irmán Anxo Nieto e a Miriam Vilarnovo. Durante o primeiro ano de traballo, entre 2022 e 2023, desenvolveron unha primeira versión da idea baixo o nome de ElectrOlive, coa que conseguiron clasificarse para as Grand Finals (top 15) e presentala presencialmente no evento internacional Rethink Waste Challenge, organizado pola Universidade de Wageningen (Países Baixos), elexidos entre máis de 100 proxectos de todo o mundo.
Posteriormente, entre finais de 2023 e 2024, con gallo de impulsar o proxecto, Marco realizou un intercambio nunha empresa sueca dentro do programa da UE de mobilidade para emprendedores Erasmus for Young Entrepreneurs, con UNINOVA como Intermediary Organisation. Grazas a esta oportunidade, estivo colaborando en remoto coa empresa sueca Absolicon desde novembro de 2023 ata a actualidade, e realizou unha estadía presencial na súa sede de Härnösand durante o verán de 2024.
