Estudantes da Universidade de Maiores de Estremadura visitan Lugo nun programa de intercambio universitario

Medio centenar de alumnos da Universidade de Maiores de Estremadura visitan este xoves a sede universitaria luguesa no marco dun intercambio con estudantes do programa de IV Ciclo USC, no que tamén participará estudantado sénior da institución académica compostelá, tanto en Santiago como en Lugo.

A delegación estremeña comezou a súa estadía na capital luguesa cunha recepción institucional no auditorio da Casa do Saber de Lugo, onde o vicerreitor Javier Bueno, e a alcaldesa de Lugo, Lara Méndez, deron a benvida ao alumnado da Universidade de Maiores de Estremadura, no marco dunha sesión na que tamén participaron a directora do IV Ciclo da USC, Esther Olveira Olveira, e a coordinadora deste programa de formación de maiores na sede universitaria luguesa, Teresa Rodríguez.

Unha visita guiada á Domus do Mitreo, a cargo do arqueólogo Celso R. Cao, seguido douto percorrido pola catedral de Lugo, conducido pola conservadora do museo diocesano de Lugo, Carolina Casal Chico, serviron de preludio ao almorzo de confraternidade que compartiron no casco histórico lugués a delegación sénior estremeña con estudantes e profesores do IV Ciclo da USC.