Expertos de Alemaña, Israel, Italia, Portugal, Turquía e España presentan en Santiago os últimos avances tecnolóxicos aplicados á Odontoloxía

Santiago de Compostela congregará a vindeira fin de semana, por vez primeira en Galicia, aos principais expertos nacionais e internacionais na aplicación das novas tecnoloxías á Odontoloxía, con especial énfase na utilización do Láser. Será no transcurso do décimo Congreso da Sociedad Española de Láser Odontoestomatológico (SELO) que se celebra os días 12 e 13 de febreiro na Facultade de Medicina e Odontoloxía da USC.
Os principais detalles deste encontro que pretende avanzar na aplicación das novas tecnoloxías á mellora da saúde e do benestar dos doentes presentaranos en rolda de prensa o presidente e a secretaria do comité organizador, Gonzalo López Castro e Mercedes Gallas Torreira. Será nun acto que se vai celebrar na Sala de Prensa do Colexio de Fonseca este martes 9 a partir das 11:30 horas.
Cualificado co recoñecemento de interese sanitario da Xunta de Galicia e acreditado pola Consellaría de Sanidade, entre os conferenciantes atópanse os presidentes da Academia Europea de Medicina Oral, da Federación Mundial do Láser e da Sociedade Española de Medicina Estética, ou o xefe de servizo de Avaliación de Riscos da Axencia Española de Medicamentos, entre outros, ademais de profesionais que actualmente traballan en múltiples ámbitos da saúde bucal.