Expertos internacionais do Observatorio Pierre Auger reúnense esta semana na USC para analizar as últimas investigación arredor dos raios cósmicos
Preto de 160 científicos pertencentes aos diversos países integrantes da colaboración Internacional Pierre Auger asisten na USC, ata o próximo venres 24, á xuntanza xeral que a colaboración celebra para analizar as últimas investigacións desenvolvidas arredor dos raios cósmicos. É unha xuntanza que na edición compostelá organizan investigadores do grupo de Física de Astropartículas do Departamento de Física de Partículas e do Instituto Galego de Física de Altas Enerxías da USC, baixo a coordinación do profesor Enrique Zas e da investigadora Inés Valiño. As distintas sesións de discusión celebraranse na súa maioría na Facultade de Medicina, mentres que a sesión de clausura trasladarase ao Mosteiro de San Martín Pinario. O programa científico comezou este luns 20. A colaboración Internacional Pierre Auger está formada por aproximadamente 450 científicos de 17 países que trata de estudar as partículas máis enerxéticas do universo coñecidas ata o momento, os raios cósmicos. Os expertos tratan de determinar a súa natureza, enerxía e lugar de orixe como camiño para comprender mellor o universo. Para os estudos destes raios, a colaboración conta co detector máis grande do mundo, o Observatorio Pierre Auger, composto por 1.600 detectores de superficie e 24 de fluorescencia que cobren unha área de aproximadamente 3.000 quilómetros cadrados na rexión de Marlagüe en Arxentina. As investigacións desenvolvidas ata o momento sobre os raios cósmicos permitiron determinar que se trata dunhas partículas cargadas cunha enerxía dez millóns máis elevada que as do acelerador de partículas LHC do CERN. O profesor Enrique Zas explica que estes raios son “auténticos mensaxeiros dunha parte descoñecida do universo” e “a súa investigación servirá para o desenvolvemento dunha nova Astronomía”.
Nas xuntanzas xerais que a colaboración organiza periodicamente preséntanse os últimos resultados científicos acadados polos investigadores así como as perspectivas de futuro. Trátase de investigacións de interese dende o punto de vista da Física de Partículas, dado que as colisións que se producen cando estas partículas de alta enerxía chegan á Terra “son descoñecidas para os físicos que estudan a enerxía cotiá”. As persoas interesadas poden acadar máis información na páxina web http://fpaxp1.usc.es/aanalysis/.