Formación do Profesorado aborda nunha xornada os perigos que depara o consumo de drogas unido á condución

A Facultade de Formación do Profesorado do Campus Terra da USC e a Fundación Galega contra o Narcotráfico celebrarán o vindeiro 15 de marzo unha xornada informativa e de sensibilización orientada a alertar dos riscos que depara unir o consumo de drogas á condución.

A xornada, que se desenvolverá en quenda de mañá, de 13.00 a 14.30 horas, é de acceso libre e de balde. Trátase dunha sesión de debate especialmente dirixida ao público universitario, aínda que aberta á participación de toda a poboación interesada pola temática. O obxectivo principal desta mesa de debate, na que intervirán como relatores responsables da Dirección Xeral de Tráfico, Garda Civil e mesmo testemuñas de vítimas de sinistros de tráfico, é o de informar e sensibilizar á poboación universitaria de Galicia sobre o grave perigo que supón o consumo de drogas unido á condución.

Os distintos relatores convidados abordarán ao longo da xornada diversos contidos relacionados coas consecuencias da condución de vehículos baixo os efectos do alcol ou doutras drogas, con especial atención ás derivacións desta problemática no ámbito sanitario e legal. Así, ademais de informar e sensibilizar sobre os graves perigos que supón a mestura de drogas e a condución de vehículos, os promotores deste foro monográfico pretenden lograr un posicionamento activo entre a mocidade, concienciando aos condutores sobre a importancia de conducir dun modo responsable, a fin de evitar unha práctica de altísimo risco como o é conducir baixo os efectos das drogas.

Programa

A xefa provincial de Tráfico de Lugo, Paula Yubero Plazo, abrirá a quenda de intervencións deste foro cunha exposición sobre a análise de situación da DXT. De seguido intervirá o tenente coronel e xefe do sector Tráfico de Galicia da Garda Civil, Javier Molano Martín. A delegada en Galicia da asociación Nacional de Lesionados Medulares e Grandes Discapacitados Físicos (Aspaym), Isabel Díaz García, pechará a quenda de exposicións co relato dun testemuño dunha vítima de accidente de tráfico.