Formación do Profesorado acolle este xoves a inauguración do III do Máster en Dirección de Actividades Educativas na Natureza

O vicerreitor de Coordinación e Planificación do campus de Lugo, Pedro García Herradón, presidirá este xoves, a partir das 17.00 horas, no salón de actos da Facultade de Formación do Profesorado de Lugo, a inauguración oficial da terceira edición do máster en Dirección de Actividades Educativas na Natureza.

O director e coordinador deste posgrao oficial pioneiro no sistema universitario español, o profesor Uxío Ortero Urtaza; o decano da Facultade de Formación do Profesorado do campus de Lugo, Francisco Rodríguez Lestegás, e a deputada provincial delegada da Área de Economía, Pilar García Porto, tamén participarán neste acto oficial de apertura da terceira edición do máster. O posgrado en Dirección de Actividades Educativas na Natureza, un programa que está estruturado en 60 créditos ECTS e cuxa carga docente corre a cargo de preto de vinte profesores universitarios, conta xa con preto de vinte persoas inscritas, boa parte de delas procedentes de fóra da provincia de Lugo. O prazo de matrícula neste máster oficial da USC permanece aberto ata o vindeiro 4 de outubro.

O catedrático do Departamento de Produción Vexetal da Universidade de Santiago de Compostela Antonio Rigueiro Rodríguez abrirá, logo do acto de inauguración oficial, a quenda de relatorios desta nova edición do máster en Dirección de Actividades Educativas na Natureza, cunha charla que se desenvolverá baixo o título ‘Soutos e bosques de ribeira: ecosistemas en perigo en Galicia’ .