A II Carreira Popular Campus Terra Leyma percorrerá o 2 de decembro un treito do paseo do Miño e a contorna universitaria
O Servizo de Deportes da USC celebrará o vindeiro 2 de decembro a II Carreira Popular Campus Terra Leyma , unha cita atlética de carácter internacional e aberta á participación de deportistas federados, non federados, ademais de a categorías escolares. O itinerario da proba sénior é de 7.400 metros de distancia e dificultade media, un trazado que descorrerá pola contorna da sede universitaria luguesa tras cubrir un treito do parque urbano do río Miño. A inscrición está aberta ata o 28 de novembro na web da Federación Galega de Atletismo.
O circuíto da II Carreira Popular Campus Terra Leyma, cuxas probas de categorías inferiores partirán ás 11.30 horas do estadio de Atletismo Gregorio Pérez Rivera de Lugo, onde tamén estará fixada a meta, será sobre asfalto e terra e estará pechado ao acceso de vehículos, agás os autorizados pola organización. A competición desta carreira, incluída no calendario oficial da Federación Galega de Atletismo, está estruturada en oito categorías: Pitufos (nados en 2013 e adiante), promoción (2010-2012), escolares 1 (2006-2009), escolares 2 (2002-2005), sénior (2001 até os 34 anos), máster A (de 35 a 44 anos), máster B (de 45 a 54 anos ) e máster C (de 55 anos en adiante).
A inscrición na II Carreira Popular Campus Terra Leyma, que só poderá formalizarse a través da páxina web da Federación Galega de Atletismo, custa 5 euros para adultos e o prazo permanecerá aberta ata as 23.59 horas do 28 de novembro de 2018. Os dorsais poderán recollerse o día anterior á proba no edificio da Biblioteca Intercentros do campus de Lugo. As persoas procedentes de fóra do concello de Lugo poderán retirar os dorsais ata media hora antes do comezo da proba na zona habilitada pola organización nas instalación do Estadio Gregorio Pérez Rivera.
Todas as persoas que formalicen a súa inscrición nesta proba atlética recibirán como agasallo unha camiseta técnica. A organización establece premios para os tres primeiros clasificados masculinos e femininos da carreira absoluta. Haberá tamén trofeos para os tres primeiros corredores por categoría e sexo. Á marxe desta clasificación xenérica, a I Carreira Popular Campus Terra da USC constitúe tamén a quinta proba do campionato universitario galaico duriense, no que participan equipos das tres universidades galegas, así como das institucións académicas lusas de Porto, Tras Os Montes e Alto Douro e Universidade de Miño.
Dimensión solidaria
A II Carreira Popular Campus Terra da USC é unha cita deportiva de marcado selo universitario, pero tamén presenta unha clara orientación solidaria, como o proba o feito de que Federación Galega contra o Narcotráfico percibirá como doazón un euro de cada inscrición, ao tempo que se trata dunha iniciativa encamiñada a fomentar os hábitos saudables entre a comunidade universitaria, en particular, e no conxunto da sociedade en xeral.
A vicerreitora de Coordinación do campus de Lugo, Montserrat Valcárcel Armesto, salientou na presentación desta cita deportiva que a II Carreira Popular Campus Terra Leyma supón unha boa oportunidade para descubrir e dar a coñecer as instalacións e os centros docentes do campus universitario de Lugo, así como da cidade. Valcárcel tamén remarcou o agradecemento da institución académica a todas as entidades públicas, nomeadamente Concello de Lugo e Deputación Provincial de Lugo e Xunta de Galicia, así como ás empresas que, co seu patrocinio, contribúen ao desenvolvemento deste evento deportivo, e entre as que se atopan o Grupo Leche Río, Coca Cola Parner España, Torvar e o Grupo El Progreso.
O acto de presentación da II Carreira Popular Campus Terra Leyma congregou este martes no edificio da Vicerreitoría de Coordinación do campus de Lugo ao deputado provincial delegado de área de Deportes, Pablo Rivera Capón; o delegado da Federación Galega de Atletismo, José Manuel Peña Rodríguez, así como a Jesús García, en representación do Grupo Leche Río S.A., e Jesús Castro, responsable do Servizo de Deportes da USC no campus de Lugo.