Investigadores brasileiros e españois reúnense a vindeira semana no CEA para debater sobre a resposta dos humedais tropicais ao cambio climático

Investigadores das universidades de Oviedo, Sao Paulo, Federal de Pernambuco, Federal de Fortaleza e da propia USC celebrarán a vindeira semana unha xornada en Santiago para presentar as principais liñas de investigación desenvolvidas arredor do proxecto ‘Pedoloxía e comportamento bioxeoquímico de metais pesados e contaminantes orgánicos en solos de ambientes estuarinos de clima tropical e templado’.
Baixo a denominación ‘Resposta dos humedais tropicais ao cambio climático’, o encontro servirá para a posta en común dos coñecementos adquiridos no desenvolvemento deste proxecto internacional, ademais de para establecer a estrutura dunha publicación que recolla a información máis relevante. As distintas sesións previstas celebraranse no Centro de Estudos Avanzados da USC (CEA) entre os días 9 e 13.
O programa comezará o vindeiro luns 9 ás 10:00 horas coa recepción no CEA dos participantes. A primeira das sesións de traballo celebrarase esa mesma tarde, a partir das 17:00 horas, e nela o profesor da Universidade de Sao Paulo Pablo Vidal Torrado fará ‘Un percorrido por Brasil. Biomasa e solos brasileiros’. O mesmo docente será quen abra a sesión do martes 10, ás 10:00 horas, cun relatorio no que se referirá aos procesos pedoxenéticos e á tipoloxía de solos en manglares. Seguiralle o profesor Souza Junior, da Universidade Federal Rural de Pernambuco, que presentará unha intervención sobre mineroloxía en solos e sedimentos de manglares.
Na sesión da tarde intervirán o doutor Ferreira, da Universidade Federal do Ceará, co relatorio ‘ Xeoquímica de Fe, Mn e S en solos e sedimentos de manglares’ e Xosé Luis Otero, da USC, para explicar o comportamento xeoquímico de metais traza en humedais.
Os solos como sumidoiros de CO2 será o tema que abra ás 10:00 horas o programa do mércores 11, a cargo do profesor da USC Felipe Macías. Deseguido, o investigador do Departamento de Edafoloxía compostelán Xavier Pontevedra-Pombal reflexionará sobre a ‘Dinámica holocénica da materia orgánica en turbeiras, sumidoiro ou fonte?’. Xa a partir das 16:00 horas, a investigadora da Universidade de Oviedo Cristina Santín referirase á caracterización de substancias húmicas en solos de marisma’.
Na xornada do xoves 12, o profesor da Universidade de Sao Paulo M. R. Lambais abrirá ás 10:00 horas a quenda de intervencións tratando a diversidade microbiana en solos e sedimentos de marismas e manglares. Pola tarde, dende ás 16:00 horas, celebrarase un debate entre os investigadores para abordar novas perspectivas de investigación en solos sedimentos de manglar, continuando este sesión o venres 13.
Estas xornadas están organizadas polo Laboratorio de Tecnoloxía Ambiental e polo Departamento de Edafoloxía e Química Agrícola da USC, coordinadas polos profesores Felipe Macías e Xosé Luis Otero.