Investigadores da USC participan nun estudo internacional que demostra a predisposición xenética da leucemia linfática crónica

Un grupo de científicos de España, Reino Unido e Suecia acaban de descubrir variantes comúns na poboación que inflúen no risco de leucemia linfocítica crónica. O traballo supón un grande avance no coñecemento desta enfermidade e abre vías para entender outras malignas linfoproliferativas.
No estudo, que foi publicado esta fin de semana na revista Nature Genetics, participou o Grupo de Medicina Xenómica da USC que lidera o catedrático Ángel Carracedo, coa achega especial das investigadoras María Torres e Clara Ruiz-Ponte. A contribución española ao proxecto complétase co grupo de Hematoloxía do Hospital Clinic de Barcelona liderado por Elías Campo xunto con Anna Enjuanes e Emilio Montserrat.
A Leucemia Linfática Crónica (LLC) é un cancro dos glóbulos brancos que se caracteriza por un aumento lento e progresivo destas células no sangue e na médula ósea. A patoloxía causa inmunosupresión, insuficiencia da médula e finalmente provoca a invasión de células cancerosas noutros órganos. A súa causa é descoñecida e o seu prognóstico sumamente heteroxéneo, de forma que poden darse casos de supervivencia de tan só uns meses e outros nos que a esperanza de vida non se ve modificada pola enfermidade.
A LLC é a forma máis frecuente de leucemia nos países occidentais (entre o 30 e o 40% do total) e, polo xeral, é de difícil control coas estratexias terapéuticas dispoñibles. Agora, descubertas as novas rexións xénicas demóstrase o carácter polixénico desta enfermidade e ábrense novas vías para entendela. “Xenes como FARP2, o papel de MYC e a súa interacción con IRF4, un factor de regulación de interferón (IRF8) e un membro dunha familia de factores de transcrición (RFX7) parecen xogar un papel importante na LLC” explica Ángel Carracedo.
O grupo de Medicina XenómicaO grupo de Medicina Xenómica está constituído por investigadores da USC e da Fundación de Medicina Xenómica –integrada no Centro de Investigación Biomédica en Rede de Enfermidades Raras (CIBERER)-.
O deste domingo é o seu noveno artigo publicado en revistas do máximo prestixio científico como Science e Nature, dos que oito se publicaron nos últimos 3 anos (Antonio Salas, Science 2002; Rodriguez Trelles, Science 2007; Xulio Maside, Nature 2007; Xabi Costas, Science 2007; M Jesús Sobrido, Science 2008; Ángel Carracedo e Clara Ruiz, Nature 2008; Nuria Naverán Science 2008, Ángel Carracedo e Xabi Costas, Nature 2009; e Clara Ruiz, María Torres y Ángel Carracedo, Nature 2010) co que consolidan a súa traxectoria de excelencia en xenética médica.