Isabel Lirola, nova secretaria executiva do Grupo Compostela de Universidades

A profesora Isabel Lirola Delgado, vicedecana da Facultade de Dereito da USC, é a nova secretaria executiva do Grupo Compostela, que exercerá o seu cargo en funcións ata que sexa ratificado na asemblea xeral do grupo a celebrar en setembro deste ano en Finlandia. Isabel Lirola conta cunha dilatada experiencia no campo de traballo do Grupo Compostela. Así, foi responsable durante tres anos (2002-2004) dunha rede universitaria de ensino financiada pola Axencia Española de Cooperación Internacional para o Desenvolvemento (AECID) que agrupaba a universidades europeas e latinoamericanas. Ademais, debido á súa formación especializada en Dereito Europeo e Internacional realizou estancias académicas e de investigación en universidades de diversos ámbitos xeográficos e culturais (Estados Unidos, Latinoamérica, Europa, Maghreb), moitas delas como participante en programas internacionais de intercambio financiados pola Comisión Europea (TEMPUS, MEDA, ERASMUS). A secretaria executiva será responsable da xestión das actividades do Grupo Compostela, baixo a dirección do presidente, e certificará acordos e outros documentos relacionados.