Juan Jesús Gestal Otero recibiu a Insignia de Ouro da USC nun concorrido acto
O reitor Juan M. Viaño Rey impúxolle este venres a Insignia de Ouro da Universidade de Santiago de Compostela ao catedrático de Medicina Preventiva e profesor emérito Juan Jesús Gestal Otero. “Esta insignia é o símbolo do seu compromiso permanente e incansable coa Universidade e condensa o agradecemento de toda a comunidade cara vostede, profesor Gestal”, díxolle.
No acto de entrega da insignia interveu o director do Departamento de Psiquiatría, Radioloxía, Saúde Pública, Enfermaría e Medicina, Agustín Montes Martínez, para quen Gestal “foi e é” a referencia na saúde pública en Galicia nos últimos 40 anos. “Custa pensar como sería a saúde pública en Galicia sen a súa figura”, asegurou. Ao remate da súa laudatio, o profesor Montes deu lectura a unha carta de parabéns que enviou a presidenta do parlamento e ex alumna do homenaxeado, Ana Pastor.
O concorrido acto congregou no Salón Nobre de Fonseca, ademais de familiares e amizades, a numerosas autoridades, entre elas o alcalde da cidade, Martiño Noriega; o presidente do Parlamento, Miguel Santalices; ou o conselleiro de Sanidade, Jesús Vázquez Almuíña. Do eido académico, o profesor Gestal estivo acompañado por numerosos compañeiros e compañeiras ademais da totalidade do equipo de goberno.
Xa coa insignia na solapa, Juan Gestal agradeceu o recoñecemento “nun día no que me sinto moi feliz e emocionado” e que non toma como unha despedida xa que “o nomeamento como profesor emérito úneme á miña universidade para sempre”.
Ampla traxectoria
Juan Gestal, que foi decano da Facultade de Medicina durante oito anos e ata a súa xubilación e xefe do Servizo de Medicina Preventiva e Saúde Pública do Complexo Hospitalario Universitario de Santiago, é ademais académico numerario das Reais Academias de Medicina e Cirurxía e de Farmacia de Galicia, así como correspondente das Academias Nacional de Medicina de Bos Aires e de Medicina de Paraguai. É tamén doutor honoris causa pola Universidade Nacional San Luis Gonzaga de Ica (Perú).
Dedicou grande atención e esforzos á saúde laboral, en especial á hospitalaria, sendo o seu libro Riesgos del trabajo del personal sanitario obra de referencia consultada por todos os/as profesionais deste eido. Dirixiu e participou en 32 proxectos de investigación competitivos e ten publicados preto dun cento de artigos en revistas indexadas, ademais de ser autor de 25 libros e de 48 capítulos noutros volumes. Foi tamén director xeral de Saúde Pública.
Coordinou o programa de doutoramento de Saúde Pública da USC dende a súa posta en marcha a comezos dos anos 80 e as sucesivas adaptacións ata o actual programa en Epidemioloxía e Saúde Pública. Tamén coordinou o Grupo 14, grupo de investigación de Santiago do CIBER de Epidemioloxía e Saúde Pública (CIBERESP) dende 2007, e o grupo de Epidemioloxía, Saúde Pública e Servizos de Saúde da USC e da área Plataformas e Epidemioloxía do IDIS.
De esquerda a dereita: Agustín Montes, Luis Lima, Juan Gestal, Juan Viaño, Isabel Rodríguez Moldes, Consuelo Ferreiro e Julián Álvarez Foto: Servimav-USC O profesor Gestal nun momento do seu discurso Foto: Servimav-USC
