Juan Manuel Lema, novo presidente da Real Academia Galega de Ciencias

O catedrático de Enxeñaría Química da USC Juan Manuel Lema Rodicio acaba de ser elixido presidente da Real Academia Galega de Ciencias (RAGC). Lema, que foi elixido por unanimidade, substitúe no cargo a Miguel Ángel Ríos logo de cinco anos de mandato.

Acompañarano na directiva as catedráticas da USC Alicia Estévez e Pilar Bermejo, como vicepresidenta e secretaria, respectivamente; o catedrático de Socioloxía da Universidade da Coruña Antón Álvarez Sousa, como vicepresidente, e o catedrático de Teoría da Sinal e Telecomunicacións da Universidade de Vigo, Fernando Pérez, como bibliotecario.

Juan Lema A elección de Juan Lema, que precisamente acaba de xubilarse estes días, vén avalada pola súa traxectoria académica: director da agrupación estratéxica CRETUS (Cross-Research in Environmental Technologies), autor de máis de 350 artigos en revistas científicas internacionais (índice H: 54) e de 11 patentes (5 delas europeas) e director de 54 teses doutorais. Liderou ademais a acción COST ‘Conceiving Wastewater Treatment in 2020’ (Water 2020) coa participación de 34 países e coordina a rede española Novedar_Consolider e a galega REGATA.

Os seus intereses actuais en investigación céntranse na eliminación de microcontaminantes de augas residuais, en procesos de co dixestión anaerobios, Desenvolvemento de reactores para tratamiento de aguas e biorefinería.

Entre outras distincións, o profesor Lema recibiu a European Prize A-IQS for industrial enzymes, o Premio Babcock á innovación tecnolóxica, o da Fundación García Cabrerizo á innovación científica, a Insignia de ouro da USC e a medalla de ouro de enxeñaría química da Universidade de Valladolid. Ademais, é membro honorario de CODDIQ, doutor honoris causa pola PUC Valparaíso e fellow da International Water Association (IWA).