As Liñas Xerais de Orzamento para 2008 sométense este mércores á aprobación do Claustro da USC

O Claustro da Universidade de Santiago reunirase este mércores, día 19, para someter a aprobación as Liñas Xerais de Orzamento para 2008. A xuntanza, que comezará coa lectura do informe do reitor, desenvolverase a partir das 9:30 horas no Salón de Actos da Facultade de Dereito.
Na mesma reunión deste órgano de goberno universitario trataranse, para a súa ratificación, as propostas de concesión de doutoramentos honoris causa ao catedrático de Economía Aplicada da Universidade de Barcelona, Jaime Gil Aluja; ao catedrático da Universidade de Giessen (Alemaña), Winfried Stute; e ao director do Center for Subtropical Agroforestry (University of Florida), Ramachandran P.K. Nair.