Os lugares do saber na Atenas democrática, obxecto de análise na USC

Máis dunha vintena de especialistas procedentes de cinco países —Arxentina, Estados Unidos, Francia, Italia e España— danse cita dende este martes ata o xoves 4 de novembro no congreso internacional en liña ‘Os lugares do saber na Atenas democrática’. Baixo a organización de Marco V. García Quintela do grupo SÍNCRISIS da USC, este foro que se está a desenvolver no Centro de Estudos Avanzados, pretende estudar historicamente a vida intelectual ateniense tomando como fío condutor as formas en que se manifesta na topografía urbana e en relación coa posición social e institucional dos promotores e usuarios deses saberes.

“Trátase de estudar a filosofía, o teatro, ou a retórica, como expresións da vida social dos habitantes de Atenas”, explican dende a organización do Congreso no que tamén toman parte as universidades de Puerto Rico - Recinto de Río Piedras, así como as de Franche (Comté, Francia) e de Reims Champagne (Ardenne, Francia). Esta proposta baséase en achegas teóricas sobre o singular carácter epistemolóxico do espazo.

As reflexións ramifícanse cara á antropoloxía e a arqueoloxía da paisaxe. “Estes traballos subliñan a necesidade de comprender a heteroxeneidade dos lugares dado que as sociedades que os habitan concédenlles valores e sentidos que promoven, consenten, toleran ou prohiben accións segundo as súas características, os seus tempos, os grupos sociais implicados e os momentos da vida colectiva”, explican dende a organización do foro que é o resultado de dous proxectos de investigación que contan co apoio do Axencia Estatal de Investigación e da Fundación BBVA.

SÍNCRISIS. Investigación en Formas Culturais é un grupo de investigación da USC dedicado á xeración de coñecemento histórico, histórico-artístico ou filolóxico e á implementación de ideas, técnicas ou modelos de investigación sobre o patrimonio histórico e cultural.