O luns comezan as clases na Universidade de Santiago

O vindeiro luns 10 de setembro comezan oficialmente na USC as clases do curso académico 2018-2019. Ese día, que no caso dos mestrados pode retrasarse ata o 24, iníciase o primeiro período lectivo, que rematará o 14 de decembro; o segundo estenderase dende o 29 de xaneiro ao 14 de maio. Así, os prazos para realizar os exames serán do 17 de decembro ao 31 de xaneiro e do 15 de maio ao 17 de xuño.

Festivos Dado que a cerimonia oficial de inauguración de curso na Universidade compostelá tivo lugar este mércores sen que se interrompese a súa actividade institucional, o goberno da USC decidiu trasladar esa xornada festiva a mañá venres 7, de maneira que permanecerá pechada agás a Oficina de Información Universitaria, o Servizo de Xestión Académica e as tres UXAS (Campus Vida, Norte e Lugo).

A actividade académica interromperase ademais dende o sábado 22 de decembro ata o 7 de xaneiro de 2019, ambos os dous incluídos; o luns 4 e o martes 5 de marzo de 2019, coincidindo co Entroido; e en Semana Santa, dende o 15 ao 19 de abril de 2019. Tamén terá carácter festivo e non lectivo o luns 28 de xaneiro de 2019 dia da festividade de Santo Tomé de Aquino.