Na memoria de Arnau Brossa Gonzalo (1993-2024)

A Universidade de Santiago de Compostela lamenta profundamente o falecemento de Arnau Brossa Gonzalo, investigador posdoutoral que traballaba no experimento LHCb do CERN, e transmite as súas condolencias á familia e amizades así como aos compañeiros e compañeiras do Instituto Galego de Física de Altas Enerxías (IGFAE).

Arnau licenciouse en Física na Universitat de Barcelona (UB) en 2016, especializándose en física teórica. Posteriormente, realizó un máster en Astrofísica, Física de Partículas e Cosmoloxía na UB, cun traballo de máster sobre o experimento LHCb. Continuou cos seus estudos de doutoramento (2017-2022) en Física de Partículas na Universidade de Warwick (Reino Unido) baixo a supervisión do Prof. Tim Gershon e o Dr. Thomas Latham. O seu traballo gañou o Premio Springer Thesis pola súa sobresaliente investigación.

Despois de defender a súa tese na Universidade de Warwick, Arnau uniuse ao equipo de LHCb no IGFAE en 2022, para seguir traballando no experimento LHCb, primeiro como investigador posdoutoral e máis tarde como investigador Juan de la Cierva. Pasou a integrar o grupo de Lepton Flavour Universality do IGFAE, asumindo un papel de liderado.