Unha mostra en Historia lembra os cen anos da independencia nacional checoslovaca de 1918
Con ocasión do 30 aniversario do inicio da ensinanza da lingua e cultura checa no Centro de Linguas Modernas (CLM) da USC, o claustro baixo da Facultade de Xeografía e Historia acolle unha interesante exposición que lembra os 100 anos da creación de Checoslovaquia en 1918.
A inauguración tivo lugar esta mañá nun acto presidido polo vicerreitor de Oferta Docente e Innovación Educativa, Roberto López, e no que participaron ademais a embaixadora da República Checa en España, Kateřina Lukešová, a directora do CLM e unha das primeiras profesoras de lingua checa nunha institución oficial española, Kateřina Vlasáková, e o decano da facultade anfitrioa, Francisco Durán.
A mostra, organizada en colaboración co Centro Checo e a Embaixada da República Checa, ofrece un paseo pola sociedade, a cultura, a economía, a industria e os acontecementos históricos dun dos países máis avanzados no período de entreguerras, ademais das biografías dos protagonistas da independencia checoslovaca como foron Tomáš Garrigue Masaryk, Edvard Beneš e Milan Rastislav Štefánik.
A independencia O 28 de outubro de 1918 en Praga, o Comité Nacional tomou o poder e proclamou a República de Checoslovaquia. Dous días máis tarde, nunha reunión pública en Martin (actual Eslovaquia), adoptaron a Declaración de Martin, confirmando así o acordo de creación do país, desde 1993 República Checa e República Eslovaca. O primeiro presidente de Checoslovaquia foi Tomáš Garrigue Masaryk.
O Consello Nacional de Checoslovaquia xurdiu do chamado Comité Checo no estranxeiro, concretamente en París en 1916, como a autoridade central da resistencia checoslovaca durante a I Guerra Mundial. O seu primeiro presidente foi Tomas Garrigue Masaryk, como vicepresidentes Rastislav Stefanik Milán e Josef Durich e como xeneral xeral Edvard Benes.
Ao final da guerra, de xuño a setembro de 1918, o Consello Nacional de Checoslovaquia foi recoñecido pouco a pouco polos gobernos de Francia, Gran Bretaña, EE.UU. e Xapón como o futuro representante estatal checoslovaco oficial. O 14 de outubro de 1918 era transformado no chamado goberno provisional checoslovaco en París e exactamente un mes máis tarde foi elixido formalmente o primeiro goberno da República Checoslovaca.
A exposición lembra os 100 anos dende a creación de Checoslovaquia en 1918. Foto: Paula Martínez Graña
