Os novos membros do Consello de Dirección da USC toman posesión este venres dos seus cargos

O nomeamento da profesora Elvira Fidalgo como vicerreitora de Cultura e do profesor Agustín Merino como vicerreitor de Política Internacional completan a reorganización que o reitor da USC está a realizar no Consello de Dirección. Á súa vez, Jesús Antonio Casabiell Pintos substitúe ao profesor Merino que ata agora desempeñaba as funcións de vicerreitor adxunto no Campus lugués.
Os novos cargos súmanse aos xa anunciados días atrás de Juan Viaño como responsable de Profesorado e Organización Académica; de Marta Inés Miranda Castañón como vicerreitora adxunta de Infraestruturas e Servizos; e a unificación das vicerreitorías de Economía e Financiamento e de Infraestruturas nun soa, da que se encargará Miguel Vázquez Taín.
A toma de posesión dos novos integrantes do Consello de Dirección da USC celebrarase este venres 3 de abril nun acto protocolario que vai presidir o reitor Senén Barro a partir das 11:00 horas no Salón Nobre do Colexio de Fonseca.
Os cambios realizados prestan especial atención “aos grandes retos que está a acometer a USC diante dos espazos europeos de Educación Superior e de Investigación”, apunta Barro, e de xeito complementario á proxección no exterior, ás infraestruturas e á posta en valor do patrimonio da institución.
Elvira Fidalgo Francisco é profesora titular do Departamento de Filoloxía Galega dende 1996, mentres que Agustín Merino, profesor do Departamento de Edafoloxía e Química Agrícola, ocupaba ata o momento a vicerreitoría adxunta de Investigación e Proxección Exterior en Lugo. Pola súa banda, Jesús Antón Casabiell imparte docencia tamén na cidade da muralla romana adscrito ao Departamento de Fisioloxía.