Os obradoiros de música impartidos por alumnado de Mestre en Educación Infantil e Primaria finalizan esta semana
Este xoves 14 remata o obradoiro de música e movemento desenvolvido no Local Sociocultural do Rural A Peregrina por alumnas das materias Música na Educación Primaria e Motricidade infantil dentro do proxecto de innovación docente ‘Recuperando as tradicións dende a música e as artes’. Todos os xoves dende o 26 de outubro ata o 14 de decembro, este Obradoiro propuxo a rapaces e rapazas de entre 7 e 10 anos diferentes xogos de movemento, baile, ritmos con instrumentos de percusión e exploración doutros instrumentos como o violín, a frauta traveseira ou a gaita. A iniciativa conta coa colaboración do Concello de Santiago que dende 2016 apoiou propostas similares nos locais de Villestro e Figueiras.
O mesmo proxecto pechará igualmente este xoves o desenvolvemento do proxecto ‘Singing Time’ a través do que alumnado da materia de Música na Educación Primaria acudiu á Escola Infantil Breogán para interpretar cancións en inglés e realizar actividades de movemento dúas veces á semana con cativos e cativas de entre 2 e 3 anos.
O mesmo grupo impulsou tamén un proxecto de ApS na Fundación Down onde once estudantes da mesma materia ofreceron un obradoiro de iniciación musical que remata este mesmo mércores 13 cunha actividade aberta para nenos e nenas da Fundación e alumnado do colexio de educación primaria CPR Nuestra Señora del Rosario de Arzúa.
