Os organizadores da décima conferencia internacional 'Textbooks and Educational Media' celebran unha xuntanza de traballo en Santiago

Membros da directiva da International Association for Research on Textbooks and Educational Media (IARTEM) inician este martes 3 unha visita a Santiago co obxecto de planificar o desenvolvemento da décima conferencia internacional ‘Textbooks and Educational Media’, que se celebrará a comezos de setembro en Compostela. Esta décima edición do congreso traerá a debate o tema ‘Identidades locais, nacionais e transnacionais nos libros de textos e recursos educativos’.
A xuntanza, entre outros, contará coa asistencia da presidenta da asociación, a profesora da Vestfold University College, Susana V. Kudsen, e do profesor da USC Xesús Rodríguez, igualmente integrante deste colectivo.
Este encontro internacional traerá a Santiago o debate ao redor das complexas e múltiples relacións entre o contexto do proceso ensino-aprendizaxe e a socialización de identidades nacionais. Partindo desta premisa, as sesións focalizaranse no proceso de deseño, desenvolvemento, uso e selección de obxectivos dos libros de textos e outros recursos pedagóxicos. En opinión dos promotores do congreso, “será unha boa ocasión para mostrar os libros de textos e outros medios pedagóxicos como recursos para o desenvolvemento de cidadáns locais, nacionais e transnacionais” ao tempo que promover “unha rede de traballo e construción da sociedade do coñecemento”.
Os integrantes da asociación teñen previsto manter un encontro cos medios de comunicación o próximo mércores 4 para dar conta das liñas xerais do congreso, así como presentar o significado e alcance da IARTEM en relación coa investigación no eido dos libros de texto e cos medios e recursos didácticos en xeral.