Organizan un curso de técnica vocal para docentes de Ciencias da Educación

O ‘Curso de técnica vocal para docentes’ celebrarase os días 27 e 29 de febreiro na Facultade de Ciencias da Educación (Campus Vida) en forma de sesións con parte teórica e posta en práctica de exercicios de adestramento da técnica vocal. Os destinatarios son o persoal docente e investigador deste centro compostelán. Impartirá o curso a profesora, actriz de dobraxe e locutora María Julia Diz.

Esta é unha proposta formativa da Asociación de Investigadoras e Investigadores Herminio Barreiro, que oferta un total de 20 prazas. O curso axudará a coñecer o mecanismo de fonación e os diversos niveis implicados na produción da voz, as principais calidades do son e os resultados do seu emprego na emisión. Ademais de realizar un achegamento ás principais alteracións da voz, o curso tentará dotar aos futuros docentes dos recursos e estratexias fundamentais para o desenvolvemento da súa profesión nas mellores condicións vocais o que redundará na prevención de problemas de voz derivados do seu uso incorrecto.

A data límite de inscrición é o día 22 de febreiro, debendo cubrir a folla de inscrición aloxada en liña (http://ir.gl/tecnicavocal) e facer o ingreso relativo á cota de inscrición, de 20 euros para non socios/as e 10 para socios/as .

A Asociación de Investigadoras e Investigadores Herminio Barreiro está aberta a investigadores/as de calquera disciplina, tendo como requisito o de ser persoal nalgunha das seguintes condicións: alumnado de doutoramento ou máster, bolseiros de investigación, técnicos de investigación, contratados de investigación ou calquera outra situación remunerada ou non nas que se poidan atopar investigadores noveis.