Persoal e estudantes das universidades de Monterrey, Minho e Oviedo preparan na USC o seu percorrido polo Camiño portugués
Estudantes, profesores e persoal administrativo da Universidade de Monterrey (México), a Universidade do Minho (Portugal) e a Universidade de Oviedo (España) están a percorrer o Camiño portugués no marco do proxecto ‘Unindo o coñecemento universitario no Camiño’. Como prólogo ao percorrido, os participantes asistiron, no Paraninfo da USC, ao acto académico de inauguración desta iniciativa da que son colíderes as tres universidades do Sistema Universitario de Galicia e que potencia o intercambio da cultura e dos coñecementos científico-tecnolóxicos.
Na primeira fase do proxecto, os participantes divídense en tres equipos para traballar sobre temáticas como os Obxectivos de Desenvolvemento Sustentable, o Camiño de Santiago, a terceira idade, a mobilidade, o medio rural e os peregrinos. Estas sesións de traballo en equipo, complementaranse con charlas, sesións de mentoría, divulgativas non formais, e de intercambio de experiencias.
Trala inauguración, os participantes foron trasladados ao concello pontevedrés de O Porriño para iniciar o percorrido, que rematará o próximo xoves 24 en Santiago de Compostela, despois de camiñar máis de 100 quilómetros. Ao día seguinte, no marco do encontro final do proxecto ‘Unindo o coñecemento universitario no Camiño’, terán a oportunidade de presentar os traballos desenvolvidos en equipo e as súas experiencias, novamente no Paraninfo da Universidade de Santiago de Compostela.
O programa do evento inclúe na súa parte académica relatorios de expertos como o conselleiro especial do programa de Itinerarios Culturais do Consello de Europa, Eladio Fernández Galiano, e o fundador do Instituto de Estudos das Peregrinacións da institución de educación superior William & Mary, George Greenia. Este proxecto está impulsado polo Grupo Compostela de Universidades e financiado pola Xunta de Galicia dentro do programa O Teu Xacobeo.