Piano no Círculo das Artes de Lugo para conmemorar o segundo centenario do nacemento de Franz Liszt

Con motivo do segundo centenario do nacemento do compositor e pianista húngaro Franz Liszt, Lugo Cultural trae á cidade, logo de terse celebrado en Compostela, un ciclo de dous concertos de piano. O primeiro deles será este mércores 23 ás 20.30 horas no Salón Rexio do Círculo das Artes, con entrada libre. O pianista cubano Antonio Queija Uz e o vigués Juan Ignacio Martínez interpretarán Années de pèlerinage, Deuxième année, Italie, S. 161: nº 4; Sonetto 47 del Petrarca; Rapsodie hongroise, S.244: nº 6; Années de pèlerinage, Deuxième année, Italie, S. 161: nº 1; Sposalizio; Années de pèlerinage, Première année, Suisse, S. 160: nº 9; Les cloches de Genève; Rapsodie espagnole, S.254; Années de pèlerinage, Première année, Suisse, S. 160: nº 6; Vallée d'Obermann; Muiñeira de Juan Montes, op.31 nº 2 de Anselmo González del Valle (-1911); e rematarán coa peza Danza española op.12 nº 1 para piano a catro mans de Moritz Moszkowsky (Polonia, 1854-1925). Franz Liszt Liszt (Raiding, actual Hungría, 1811-Bayreuth, Alemaña, 1886) foi o precursor do recital para piano e o pianista máis influinte do século XIX, ademais dun dos innovadores da harmonía nesa época, sobre todo co uso de complicados acordes cromáticos.

Entre as súas 350 obras pianísticas destacan os doce Estudos de execución trascendental (1851), as vinte Rapsodias húngaras (1846-1885; nº 20 sen publicar), os Seis estudos sobre un tema de Paganini (1851), o Concerto nº 1 en mi bemol maior (1849; revisado en 1853), o Concerto nº 2 en la maior (1848; revisado en 1856-1861) e as pezas que forman os tres volumes de Anos de peregrinación (1855, 1858, 1877).