A Plataforma de Enxeñaría da Madeira Estrutural da USC presenta o seu máster propio en Lugo

A Sala de Xuntas da Escola Politécnica Superior de Lugo acollerá este mércores 25, ás 11:30 horas, a presentación do Máster propio en Enxeñaría da Madeira Estrutural na súa edición para o curso 2011/12, único posgrao en España que oferta esta formación específica e especializada. O acto servirá tamén para coñecer a actividade da Plataforma de Enxeñaría da Madeira Estrutural da USC (Pemade), fundada en 2008 como estrutura da USC e con sede na EPS. Participan no acto o vicerreitor de Coordinación e Planificación do Campus de Lugo, Pedro García Herradón; o director do Máster, Manuel Guaita Fernández; o director da EPS, Javier Bueno; e o xerente do Clúster da Madeira de Galicia, que a continuación ofrecerá unha charla sobre os retos e oportunidades do sector da madeira.

Ao remate da presentación e da charla, ás 12:30 horas, haberá unha visita guiada ao Laboratorio de Enxeñaría de Estruturas da Plataforma de Enxeñaría da Madeira Estrutural da USC (Pemade), que posúe un equipamento único en España con estas capacidades.