Portas abertas ás actividades deportivas da USC

Como cada ano, a Universidade de Santiago dá a toda a cidadanía a oportunidade de probar ou observar in situ o desenvolvemento das sesións que organiza o seu Servizo de Deportes e consultar aos monitores as dúbidas que poidan xurdir. Así, tanto en Lugo como en Santiago ábrese gratuitamente do 1 ao 11 de outubro o acceso a todas as actividades deportivas, agás as acuáticas e tenis. En Compostela ofrécense adestramentos de deportes colectivos e tradicionais, aerobic e step, zumba, atletismo, bailes latinos e de salón, baile en liña e country, baile deportivo e xuvenil, esgrima, ioga, judo, karate, kung-fu, mantemento, mellora da condición física, meditación, pilates, taekwondo, tai-chi, tiro co arco, ximnasia terapéutica e xadrez. En Lugo as actividades son acondicionamento físico, danza oriental, esgrima, GAP, ioga, mantemento+aeróbic+step, pilates, squash, xadrez e ximnasia de mantemento.