Novo prazo para participar no Programa de préstamo de bicicletas da USC

Por sétimo ano consecutivo, a Oficina de Desenvolvemento Sostible da USC pon en marcha o programa de préstamo de bicicletas dirixido a todos os membros da comunidade universitaria tanto do campus de Lugo como de Santiago. En total cederanse gratuitamente preto de 250. O prazo para presentar solicitudes comeza este mércores 10 ás 9.00 horas e durará ata as 14.00 horas do día 24. Quen a desexe terá que cumprimentar o formulario que atopará no apartado ‘Como podo participar?’ do web do programa. O día de recollida da bicicleta xunto coa lista de persoas seleccionadas (por estrita orde de presentación) e de agarda faranse públicas na mesma páxina web. Na convocatoria do curso pasado 489 persoas solicitaron unha bicicleta. Deles, o 91% eran estudantes, o 3% persoal docente e investigador e o 3% persoal de administración e servizos. A Escola Politécnica Superior e a Facultade de Veterinaria de Lugo e a Facultade de Medicina e de Odontoloxía de Santiago foron os centros que maior demanda presentaron. Descontos para mercar bicicletas Ademais, a USC asinou un acordo con empresas subministradoras d localizadas nos dous campus para ofrecer distintas vantaxes e descontos en compra de bicicletas, materiais complementarios para os ciclistas, pezas e man de obra nos arranxos. As persoas interesadas deberán dirixirse a Bicicletas Oliveira, en Santiago de Compostela, e a MTC Bicicletas, en Lugo, e presentar a tarxeta universitaria. Accións do PDS O Programa de préstamo de bicicletas enmárcase nas diversas iniciativas nas que traballa a Oficina de Desenvolvemento Sostible para promover actuacións de mobilidade sostible nos campus universitarios. Entre as accións postas en marcha destaca o Programa Comparte Coche na USC que implica unha redución das emisións de CO2 e unha menor incidencia doutros problemas asociados ao tráfico como son a contaminación acústica ou a excesiva ocupación de espazos.