O prazo para a presentación de propostas ao VIII Concurso de Proxectos Empresariais Innovadores da USC permanecerá aberto ata finais de xaneiro

O Concurso de Proxectos Empresariais Innovadores da USC repartirá na súa oitava edición un total de 22.000 euros en premios así como un préstamo participativo doutros 24.000 euros entre aqueles proxectos de empresa innovadores que se presenten a concurso.
Este concurso, unha iniciativa do programa de fomento da cultural emprendedora na USC Uniemprende, ten como obxectivo impulsar a creación de empresas innovadoras promovidas por estudantes, licenciados ou investigadores universitarios, así como a innovación empresarial e a xeración de emprego. O prazo para a presentación de propostas permanecerá aberto ata ás 14:00 horas do 31 de xaneiro de 2008 .
O concurso está aberto á participación de estudantes e titulados de calquera das tres universidades galegas e dos centros asociados da UNED en Galicia, con independencia da área de coñecemento, que, de xeito individual ou en equipo, teñan un proxecto innovador con potencialidade para converterse nunha empresa. Tamén poderán participar doutores, doutorandos, persoal de investigación, ou alumnos de Terceiro Ciclo que desenvolvan a súa actividade en calquera universidade galega e aquelas empresas xa constituídas ao longo do ano 2007 por promotores co perfil descrito.
As persoas interesadas en participar neste concurso deberán presentar o currículo dos promotores e unha memoria descritiva do proxecto que incluirá, sen superar as 50 páxinas, o título e a descrición, sector ao que se dirixe, produtos ou servizos que se pretenden ofertar, análise da competencia, plan comercial e de marketing, recursos humanos, plan de investimentos e financiamento e unha conta de resultados, todo elo contemplado para un horizonte temporal de cinco anos.
O equipo de asesores de autoemprego da USC e o persoal da incubadora de empresas da institución académica Uninova estará a disposición dos promotores para axudalos na elaboración dos proxectos. As persoas interesadas tamén poderán conseguir un formulario para a elaboración do plan de empresa na páxina web de Uninova (http://www.uninova.org/ga/idea.asp). No caso de que a Comisión Avaliadora de Proxectos estime necesario solicitar máis información, poñerao en coñecemento dos participantes para que no prazo de 15 días complete o expediente.
PremiosNa edición deste ano, o concurso contempla un total de cinco categorías comezando pola de Base Tecnolóxica, para a que establecen dous premios, o primeiro dotado con 9.000 euros e acceso a un préstamo participativo de ata 24.000 euros ofrecido por Unirisco Galicia SCR, e un segundo premio de 5.000 euros. As restantes categorías correspóndense a Empresa Xove, Muller Emprendedora, Proxecto Medioambiental, e Proxecto con Sensibilidade Social, cada unha delas dotada con 2.000 euros.
Todos os finalistas do concurso terán acceso a financiamento a través da Rede de Inversores Uniban, e de xeito adicional, os proxectos gañadores terán tres meses gratuítos de domiciliación na incubadora de empresas Uninova.
XuradoO xurado encargado de avaliar os proxectos presentados a concurso estará composto por representantes da USC e das entidades colaboradoras. Os criterios de valoración que se terán en conta para emitir o seu ditame centraranse na viabilidade do proxecto, grao de innovación do produto, proceso ou servizo, volume de emprego proxectado, carácter multidisciplinar do equipo de promotores e ter en conta as políticas de igualdade.
Para acadar máis información, as persoas interesadas poden dirixirse á páxina web de Uniemprende (http://www.uniemprende.es).