Preto de catrocentos estudantes de ensino medio de toda Galicia visitan estes días os centros da USC

Estudantes de Ensino Medio de toda Galicia visitan estes días os centros da USC nuns percorridos nos que ademais están a obter información de primeira man sobre os estudos que pensan cursar. Os Encontros na Zona USC, que se repetirán a comezos do mes de abril, celebráronse esta semana no Campus de Santiago e a pasada en Lugo.
En Compostela, foron preto de catrocentos os mozos e mozas que se achegaron aos diferentes centros esta semana, procedentes todos eles de institutos de Malpica, Muros, Padrón, Ribeira, A Pontenova, As Neves e Vigo.
En horario de mañá ou de tarde, os estudantes de ensino medio puideron escoller entre tres percorridos, un polo campus Norte e centro histórico, outro polo Sur e un terceiro de carácter máis divulgativo que comprende visitas ao patrimonio histórico da Universidade, ao Museo Luis Iglesias, ao Centro Superior de Hostalaría de Galicia e á mostra ‘Dos ábacos aos computadores’.