O profesor Felipe Macías, socio de honra da Sociedade Española da Ciencia do Solo

A Sociedade Española da Ciencia do Solo (SECS) acaba de nomear socio de honra ao catedrático do Departamento de Edafoloxía da USC Felipe Macías Vázquez, que durante oito anos presidiu esta entidade científica.
A SECS, integrada na Internacional Union of Soil Sciences (IUSS), agrupa a máis de catrocentos especialistas en ciencia do solo, principalmente de España, se ben conta con socios en México ou Arxentina. O seu propósito é, dende a súa fundación en 1947, coordinar e fomentar os traballos relacionados coa Ciencia do Solo e servir de vínculo entre os expertos integrados nos distintos organismos oficiais.
Macías súmase así ao grupo de honra da SECS no que figuran Carlos Roquero de Laburu, Antonio Guerra Delgado, José Manuel Gandullo e José Aguilar Ruiz, e do que formaron parte os finados Luis Alías Josafat e Francisco Guitián.
Felipe MacíasFelipe Macías (A Coruña, 1948) licenciouse en Química en 1970 na USC, onde catorce anos máis tarde acadou a cátedra de Edafoloxía e Química Agrícola. Coordinador do Laboratorio de Tecnoloxía Ambiental do Instituto de Investigacións Tecnolóxicas da USC desde 1997, foi director de 25 teses de doutoramento, autor de máis de 250 publicacións e investigador principal de máis de cen proxectos en cuestións relacionadas co solo, augas e hábitats, avaliación e planificación de recursos naturais, solos contaminados ou riscos ambientais.
Foi ademais director xeral da Axencia de Calidade Ambiental da Consellaría de Ordenación do Territorio entre 1988 e 1989, membro do Consello de Administración de SOGAMA e do grupo de traballo sobre a Rede Natura e vogal e secretario do Comité de Ciencias da Natureza da Comisión Nacional Avaliadora da Actividade Investigadora, entre outros moitos cargos.