A profesora Mª Xosé Rodríguez Galdo asume a dirección do Centro de Estudos Avanzados

O Centro de Estudos Avanzados da USC (CEA) debe dar a coñecer “o que a Universidade de Santiago é e o que nela se fai”, poñendo énfase na posta en valor do capital humano da institución académica nun momento de especial aposta polo coñecemento como vía para contrarrestar a crise. Deste xeito, explicou a catedrática de Historia e Institucións Económicas María Xosé Rodríguez Galdo a vontade coa que asume a dirección do CEA no acto de toma de posesión celebrado este mércores 29.
Ademais da súa función como altofalante do día a día da universidade, Rodríguez Galdo considera que o Centro é un exemplo de colaboración institucional, vía pola que aposta seguir traballando nos próximos anos “agardando ser unha digna sucesora dos meus predecesores, os profesor Félix Vidal e Carlos Acuña”, subliñou no acto.
O reitor da USC, Senén Barro, que presidiu a toma de posesión en San Xerome, insistiu igualmente na necesidade de que o CEA se afiance como interface entre o espazo universitario e a sociedade e ao tempo que sexa unha “etiqueta de calidade e prestixio”.
Animando á nova directora a que tome o relevo ao fronte do CEA coa vontade firme de “ir máis alá e dando pasos importantes para o conxunto da universidade”, o reitor aposta por seguir construíndo un Centro de Estudos Avanzados “que represente a toda a comunidade universitaria, sensible das súas preocupacións, intereses ou aspectos do coñecemento e do desenvolvemento tecnolóxico”.
Centro de Estudos Avanzados-Casa EuropaO CEA proporciona mecanismos que permiten debater e difundir ideas entre a comunidade universitaria e cara a sociedade, así como estimular as colaboracións no ámbito internacional, especialmente en Europa.
Dende esta perspectiva, os enfoques plurinacionais e multidisciplinares das actividades impulsadas polo centro pretenden achegar e proporcionar á escena universitaria a masa crítica necesaria para a investigación de excelencia e permitir explorar novos camiños de coñecemento. Tamén é obxectivo do centro contribuír a situar á comunidade científica da USC nunha posición de liderado, especialmente en campos de rápida evolución.
Para alcanzar estes fins, a USC dótase de dúas ferramentas complementarias, o propio CEA e a Casa de Europa, lugar de encontro e de residencia de profesores e científicos invitados, que permiten dispoñer do mellor ambiente intelectual para a realización das actividades.
Rodríguez GaldoVicerreitora entre os anos 1984 e 1986 así como directora do Instituto Universitario de Estudos e Desenvolvemento de Galicia (IDEGA) de 1986 a 1991, María Xosé Rodríguez Galdo é autora de numerosos libros e artigos de investigación en temas relacionados coa historia económica e empresarial, economía e xénero, ou demografía e procesos migratorios.
Ata o momento era, ademais, directora do ‘Centro de Estudios de Población y Análisis de las Migraciones’ (CEPAM) e do portal www.emigratio.com, sendo integrante tamén do Centro Interdisciplinario de Investigacións Feministas e de Estudos de Xénero (CIFEX) e do Seminario Mulleres e Universidades da USC.