O reitor Juan Casares imporalle a Insignia de Ouro da USC ao profesor Jorge Dias de Deus

O profesor Jorge Dias de Deus, do Instituto Superior Técnico de Lisboa e do Centro Multidisciplinar de Astrofísica de Portugal, recibirá o xoves 13 a Insignia de Ouro da USC en recoñecemento a máis de 30 anos de colaboración continuada con docentes e investigadores da USC no ámbito da Física de Partículas. O reitor Juan Casares presidirá a imposición que se celebrará a partir das 12.00 horas no Salón de Graos do Colexio de San Xerome, e na que tamén intervirá o profesor Carlos Pajares. Jorge Dias de Deus colabora con integrantes do Departamento de Física de Partículas dende o ano 1979, tanto no desenvolvemento de proxectos de investigación conxuntos, como na titoría de doutorandos ou na elaboración de artigos con membros da USC. É un investigador prestixioso, recoñecido no seo da comunidade internacional, cunha traxectoria intensa sendo investigador en centros de prestixio como o Instituto Niels Bhor de Copenhague, a Universidade de París VI, o laboratorio Rutherford ou o University College de Londres. Entre outros cargos, foi director do Instituto Superior Técnico e presidente da Axencia para a Enerxía portuguesa, así como fundador do Centro Multidisciplinar de Astrofísica (CENTRA).