O reitor da USC preside o acto de entrega do premio AITEMIN a David Rubinos González

O reitor da USC, Senén Barro, presidirá este mércores 24 o acto de entrega do premio á mellor tese de doutoramento 2008 da Asociación para a Investigación e Desenvolvemento Industrial dos Recursos Naturais (AITEMIN) a David Rubinos González, do Departamento de Edafoloxía e Química Agrícola. A entrega celebrarase a partir das 13:00 horas no Salón de Graos do Colexio de San Xerome.
A tese de Rubinos González versou sobre ‘Utilización de lodos de bauxita na contención e inactivación de residuos tóxicos e perigosos’ e estivo dirixida pola profesora Mª Teresa Barral e o profesor Francisco Díaz-Fierros nos laboratorios da Facultade de Farmacia.
O premio, de carácter estatal e dotado con 6.000 euros, está encadrado na categoría explotación, valoración, conservación, aproveitamento, restauración e reciclado dos recursos naturais. Integran AITEMIN, entre outras empresas, Hunosa, Enresa ou Endesa.