O reitor da USC preside este venres a entrega do XIV Premio Aresa de Desenvolvemento Rural na Facultade de Veterinaria

O reitor da Universidade de Santiago de Compostela, Juan Casares, presidirá este venres, a partir das 20.00 horas, no auditorio da Facultade de Veterinaria do campus de Lugo, a cerimonia de entrega do XIV Premio Aresa de Desenvolvemento Rural, un galardón dotado con 10.000 euros en metálico e que nesta ocasión recaeu na empresa Alibos SL.

O presidente de Alibos SL, unha firma emplazada no concello de Monterroso, Jesús Quintá García, recollerá o galardón de mans do presidente do grupo de subministros agrogandeiros Aresa, Álvaro Rodríguez Eiras, no transcurso dunha cerimonia durante a que o presidente de Tecnoma e membro do xurado encargado de fallar o XIV Premio Aresa de Desenvolvemento Rural, Carlos del Álamo, ofrecerá o relatorio ‘A nova PAC, o capital natural e os servizos ambientais’. A entrega do XIV Premio Aresa de Desenvolvemento Rural congregará este venres na Facultade de Veterinaria de Lugo un nutrido grupo de representantes políticos, entres os que se agarda a presenza dos conselleiros de Economía e Industria, Francisco Conde, e de Medio Rural e do Mar, Rosa Quintana. O alcalde de Lugo, José López Orozco tamén asistirá ao acto, no que tamén participarán outros representantes e cargos políticos locais, provinciais e autonómicos, ademais de clientes e provedores do grupo empresarial Aresa.