Remata o prazo de presentación de candidaturas ao Premio Humanitas de accións solidarias

O vindeiro 30 de outubro rematará o prazo para presentar candidaturas á quinta edición do Premio Humanitas que convocan o Consello Social da USC e a Asociación de Antigos Alumnos e Amigos da universidade compostelá (AAAAUSC). A iniciativa recoñece as accións solidarias levadas a cabo por persoas físicas, colectivas ou asociacións que se distingan polas súas cualidades humanas, mediante a súa dedicación en actividades solidarias, sociais e humanitarias.
Poderán optar ao premio o persoal docente e investigador, o de administración e servizos e os estudantes da USC así como os socios da Asociación de Antigos Alumnos e Amigos. Para acceder á convocatoria deberase presentar unha memoria detallada da candidatura, que terá que estar avalada por dous membros do Consello Social, do Consello de Goberno da Universidade ou da Asociación.
O xurado, que fará público o ditame en novembro, estará constituído polo reitor e outra persoa designada por el entre o Consello de Goberno da USC; o presidente e a secretaria da Asociación de Antigos Alumnos; o presidente e un voceiro do Consello Social; e o gañador da edición anterior. O premiado recibirá 3.000 euros, a Insignia de Prata da AAAAUSC e un diploma acreditativo.
Para acadar máis información sobre este premio, as persoas interesadas poden visitar á paxina web da convocatoria: http://www.antiguosalumnos.usc.es/galego/humanitas.asp