As residencias universitarias e colexios maiores inician as súas actividades en materia de sostibilidade

As bolsas de Aula Verde do SUR, financiadas conxuntamente pola Vicerreitoría de Comunidade Universitaria e Compromiso Social e a Oficina de Desenvolvemento Sostible da Vicerreitoría de Calidade e Planificación, porán en marcha ao longo de todo o curso diferentes actividades ambientais.
Unha primeira xuntanza entre os bolseiros, responsables das residencias e colexios maiores e o persoal da Oficina de Desenvolvemento Sostible, levou a análise da situación da xestión de residuos nestes centros universitarios e a dotación dos contedores necesarios para unha correcta separación selectiva dos residuos xerados polos residentes. Tamén se facilitou diferente material divulgativo en relación coa xestión de residuos.
A compostaxeOutra actividade na que os bolseiros traballarán é a compostaxe dos residuos orgánicos que se producen nas cociñas. A Residencia Universitaria Bal y Gay de Lugo foi a pioneira nesta campaña, que logo se estendeu á Residencia Universitaria Monte da Condesa. Dende marzo deste ano, os Colexios Maiores tamén compostan os seus residuos orgánicos.
O principal obxectivo da campaña de compostaxe é promover hábitos responsables de separación selectiva de residuos entre membros da comunidade universitaria, pretendendo consolidala como método alternativo de tratamento de residuos nas residencias universitarias e colexios maiores.
A compostaxe é un proceso de degradación natural de residuos orgánicos que permite obter o compost, abono ecolóxico con múltiples aplicacións. Mediante este proceso aprovéitanse parte dos residuos xerados fundamentalmente nas cociñas ademais de empregarse residuos orgánicos de poda que o Servizo de Xardinaría proporciona periodicamente.
Taller de compostaxePara achegar a campaña aos residentes, este mércores 26 terá lugar, ás 22.00 no Colexio Maior Rodríguez Cadarso, un taller de compostaxe onde se falará dos materiais que se poden compostar, os beneficios do proceso e resultados de campañas anteriores. O pasado martes realizouse unha presentación similar da campaña na Residencia Universitaria Monte da Condesa, a cargo da súa bolseira de Aula Verde.
O compost producido no campus de Lugo en campañas anteriores foi empregado como material de emenda na finca de prácticas da Escola Politécnica Superior e como abono para os xardíns da residencia. En Santiago, o compost foi empregado polo Servizo de Xardinaría para a recuperación de árbores situadas no entorno da Facultade de Física. Para a análise e supervisión do proceso de compostaxe cóntase coa colaboración desinteresada da profesora Maite Barral, do Departamento de Edafoloxía e Química Agrícola da USC.
Esta experiencia constitúe unha aposta por medidas activas para mellorar a calidade ambiental dos campus e é posible grazas á colaboración entre a Oficina de Desenvolvemento Sostible, o Departamento de Edafoloxía e Química Agrícola, o persoal das residencias universitarias e colexios maiores, o Servizo de Xardinería da USC e o Servizo de Residencias Universitarias a través dos bolseiros de Aula Verde.