A Reunión de Estudos Rexionais xuntará en Ciencias Económicas e Empresariais máis de 200 especialistas de catorce países
Un total de 225 participantes de catorce países reuniranse entre os mércores 16 e o venres 18 na XLII Reunión de Estudos Rexionais que se celebra na Facultade de Ciencias Económicas e Empresariais organizada polo Grupo de Análise e Modelización Económica (GAME), o Instituto de Estudos e Desenvolvemento de Galicia (IDEGA), a Asociación Galega de Ciencia Rexional e a propia facultade. Nesta edición, a xuntanza ten como lema ‘ 30 anos de integración en Europa en perspectiva rexional: leccións dos pasados e futuros desafíos’.
Este encontro é un foro aberto a investigadores que traballan nas diferentes disciplinas que contribúen á ciencia rexional -como a economía, xeografía, urbanismo, econometría, socioloxía, política, arquitectura, ou turismo, entre outros ámbitos-, así como a todos aqueles axentes interesados en coñecer e comprender a dimensión territorial das sociedades. Presentáronse máis de 200 traballos, entre relatorios, conferencias e paneis, que tratarán cuestións relacionadas coa economía do coñecemento e xeografía da innovación; turismo e territorio; mobilidade, transporte e infraestruturas; emprendemento; enerxía, sustentabilidade, recursos naturais e ambiente; movementos migratorios; ou urbanismo e vivenda, entre outras áreas temáticas.
A inauguración oficial do encontro celebrarase este xoves 17 ás 9.00 horas, sesión que dará paso a diversas sesións paralelas de traballo. Ás 13.00 horas na Aula Tomé da Facultade está convidado a impartir unha conferencia J. Enrique Garcilazo, director da Unidade de Desenvolvemento Rural e Rexional da OCDE, unidade responsable da elaboración dos informes territoriais da OCDE sobre desenvolvemento rexional. O seu ámbito de traballo céntrase na análise de cuestións de competitividade rexional, a medición do desempeño das rexións e a identificación dos factores claves para o crecemento rexional. A súa intervención leva por título ‘Productive regions for inclusive societies: low density regions. Places of opportunity'.
Con anterioridade á inauguración, este mércores 16, o profesor Fernando Bruna imparte un taller sobre ‘Spatial econometrics with the R package’, a partir das 16.00 horas na Aula 21 de Ciencias Económicas e Empresariais, que tamén forma parte da programación da Reunión. É unha actividade dirixida especialmente a estudantes de doutoramento e investigadores novos no que participaron máis de medio cento de persoas.
Xa o venres 18, a partir das 15.00 horas na Aula Tomé, celebrarase unha sesión especial dirixida a alumnado de máster e de primeiro ano de doutoramento así como a investigadores novos para discutir os seus proxectos de investigación con prestixiosos participantes no congreso, como os profesores Hewings, da Universidade de illinois, e Steenge, de Groningen.